සිය 8 වැනි ටෙස්ට් ශතකය වාර්තාකළ ධනංජය ද සිල්වා, ලසිත් ඇඹුල්දෙනිය සමග එක්ව ශ්‍රී ලංකා කණ්ඩායමේ දෙවැනි ඉනිම ගොඩ ගැනීමට ඊයේ  (02) ගාල්ලේදී සමත්විය. ඒ අනුව ශ්‍රී ලංකා - බටහිර ඉන්දීය කොදෙව් දෙවැනි ටෙස්ට් තරගයේ සිව්වැනි දිනය නිමාවන විට ශ්‍රී ලංකා කණ්ඩායම සිය දෙවැනි ඉනිම සඳහා කඩුලු 8ක් දැවී ලකුණු 328ක් ලබා සිටියේය. ඒ අනුව සත්කාරක ශ්‍රී ලංකා කණ්ඩායම ලකුණු 279ක් ඉදිරියෙන් සිටී. විශිෂ්ට ඉනිමක් ක්‍රීඩාකරමින් සිටින සිල්වා නොදැවී ලකුණු 153 යි.ඇඹුල්දෙණිය නොදැවී ලකුණු 25යි. ඔවුන් දෙදෙනා මේ වනවිට 9වැනි කඩුල්ල සඳහා ලකුණු 107 එකතුකර තිබේ. ශ්‍රී ලංකා කණ්ඩායම වෙනුවෙන් ආරම්භක පිතිකරු පැතුම් නිස්සංක ලකුණු 66ක් රැස් කළේය. රමේෂ් මෙන්ඩිස් ද සටන්කාමී ලකුණු 25ක් රැස්කළ අතර දිනේෂ් චන්දිමාල් (02) ට සහ පාදයේ ආබාධයකින් පීඩාවිඳින ඇන්ජලෝ මැතිව්ස් (01) ට වැඩිවෙලා කඩුල්ලේ රැඳී සිටීමට නොහැකි වුණි. මෙම තරගයේ පළමුව පන්දුවට පහරදුන් ශ්‍රී ලංකා කණ්ඩායම ලකුණු 204ක් රැස්කළ අතර ඊට පිළිතුරු ලෙස කොදෙව්වෝ සිය පළමු ඉනිම සඳහා ලකුණු 252කට දැවී ගියහ.

44